uz
en
ru
O’zbek tili va adabiyoti kafedrasi mudiri :
Filologiya fanlari falsafa doktori (PhD) v.b dotsent Norqulova Shaxnoza To'lqinovna
Telefon raqam :
E-mail :
Telegram :
Qabul vaqti :
Haftaning barcha ish kunlari 10:00-16:00
Til, adabiyot va tarbiya uyg‘unligi
Bugungi kunda har bir oliy taʼlim muassasasining yuksalishida nafaqat zamonaviy iqtisodiy bilimlar, balki milliy adabiyot va tilshunoslik fanlarining ham o‘rni beqiyos. Chunki til – millat ruhi, adabiyot esa uning qalbi hisoblanadi. Shu jihatdan, Termiz iqtisodiyot va servis universitetida 2024-yildan beri faoliyat olib borayotgan O‘zbek tili va adabiyoti kafedrasi talabalarga bilim ulashish, ularni maʼnaviy dunyoqarashini boyitish va ilmiy izlanishlarga yo‘naltirishda katta maktab vazifasini o‘tamoqda.
Kafedrada hozirda 14 nafar malakali o‘qituvchi faoliyat olib bormoqda. Ularning orasida 2 nafar dotsent, 6 nafar ilmiy darajaga ega ustozlar borligi, kafedra ilmiy salohiyatining yuksakligidan dalolat beradi.
Zamonaviy yondashuv – samarali taʼlim
O‘zbek tili va adabiyoti kafedrasida talabalarga 40 dan ortiq mutaxassislik fanlari zamonaviy texnologiyalar asosida o‘qitiladi. Shuningdek, kafedra bugungi kunda kadrlarni tayyorlashda o‘zbek tili va adabiyotini o‘qitish jarayonining zamonaviy tashkiliy shakllarini joriy etmoqda. Bunda o‘qitish tizimining eng samarali yo‘llarini o‘quv jarayoniga tatbiq etishning mexanizmlari ishlab chiqilib, o‘zbek tilining nazariy, tarixiy va dialektologik jihatlari, o‘zbek adabiyoti rivojlanishining asosiy jarayonlari va xususiyatlariga etibor qaratilayapti. Shuningdek, badiiy asar mutolaasi asosida ularni falsafiy tahlil qilish uslubidan foydalanilmoqdaki, bir tomondan u o‘quvchilarni boy adabiy merosimiz, o‘zbek xalqi hayoti va milliy madaniyatimiz bilan tanishtirish, ikkinchi tomondan esa, leksik va grammatik bilimlarni boyitish vazifasini bajarib, nutqning barcha uslublarini rivojlantirishga yordam beradi. Shu asosida barcha darslar o‘z vaqtida, ilg‘or pedagogik texnologiyalar, multimedia vositalari asosida o‘tkazilmoqda.
Ilmiy izlanishlar
Kafedra o‘qituvchilari nafaqat dars jarayonida, balki ilmiy tadqiqotlarda ham faol ishtirok etmoqdalar. Hozirga qadar ularning 300 ga yaqin ilmiy maqolalari xalqaro va mahalliy nufuzli jurnallarda eʼlon qilingan. Shuningdek, kafedra aʼzolari qalamiga mansub 3 ta o‘quv qo‘llanma va 6 ta monografiya nashr etilgani – kafedraning ilmiy izlanishlarga qaratgan eʼtibori va mehnatsevarligini ko‘rsatadi.
Maʼnaviy-maʼrifiy ishlarda ham peshqadam
Kafedra nafaqat talabalarga bilim berib, ilmiy tadqiqotlar olib boradi, balki universitetda o‘tkaziladigan maʼnaviy-maʼrifiy tadbirlarning ham faol tashabbuskoridir. Turli adabiy uchrashuvlar, ijodiy kechalar, kitobxonlik musobaqalari talabalarning badiiy dunyoqarashini boyitib, ularda milliy qadriyatlar va maʼnaviyatga hurmat tuygʼusini kuchaytiradi. 2024-yilda kafedraning 2 nafar o‘qituvchisi Shaxnoza Norqulova hamda Iroda Аlmardanovalar o‘qituvchilar jamoalari o‘rtasida o‘tkazilgan “Zakovat” intellektual o‘yinida universitet jamoasining viloyatda birinchi o‘rinni qo‘lga kiritishida jonbozlik ko‘rsatgani yana bir yutuq bo‘ldi.
Aytish kerakki, kafedra tomonidan boshqa oliy talim muassasalari bilan tajriba almashish ham yo‘lga qo‘yilgan. Xususan, Turkiyadagi Istanbul universiteti bilan hamkorlik o‘rnatilgan bo‘lib, hozirda ikki oliygoh o‘qituvchilari ishtirokida konferensiyalar o‘tkazish rejalashtirilmoqda.
Bugungi kunda Termiz iqtisodiyot va servis universiteti O‘zbek tili va adabiyoti kafedrasi yurtimizda yosh avlodga bilim va maʼrifat ulashish, ularni ilmiy-ijodiy izlanishlarga yo‘naltirishda munosib hissa qo‘shib kelmoqda. Mazkur kafedraning kelgusida ham respublika va xalqaro miqyosda katta yutuqlarga erishishi shubhasiz.
