TISU delegatsiyasi Indoneziya Pedagogika universitetida (Universitas Pendidikan Indonesia – UPI) rasmiy tashrif bilan bo‘lib, ikki tomonlama hamkorlik doirasida qator muhim uchrashuvlar o‘tkazdi.

Tashrif doirasida TISU rektori A. Sattarov Indoneziya Pedagogika universitetining turli fakultet vakillari bilan uchrashdi. Jumladan, uchrashuvda Matematika va aniq fanlar fakulteti dekani Dr. Adi Rahmati, Muhandislik va sanoat ta’limi fakulteti dekani Dr. Agus Setiawan, Iqtisodiyot va biznes fakulteti dekan o‘rinbosari Dr. Toni Heryana, Tibbiyot fakulteti dekan o‘rinbosari Dr. Pipit Pitriani hamda universitetning xalqaro hamkorlik bo‘limi boshlig‘i Dr. Nandilar ishtirok etishdi.

Uchrashuv davomida tomonlar o‘rtasida quyidagi asosiy yo‘nalishlar bo‘yicha hamkorlikni rivojlantirish masalalari atroflicha muhokama qilindi:

• Talabalar almashinuvi dasturlari – ikki universitet o‘rtasida qisqa muddatli va semestr asosidagi almashinuvlarni tashkil etish;
• Professor-o‘qituvchilar uchun malaka oshirish dasturlari – TISU pedagog xodimlarining UPIda stajirovka o‘tashi;
• Visiting scholar dasturlari – TISU professor-o‘qituvchilarining UPIda dars berish imkoniyatini yaratish;
• Ilmiy-tadqiqot loyihalarida hamkorlik – qo‘shma tadqiqotlar, maqola va ilmiy nashrlar tayyorlash;
• Talabalar uyushmalari o‘rtasidagi aloqalarni mustahkamlash – ikki universitet talabalari o‘rtasida qo‘shma startup loyihalarini tashkil etish;
• Kutubxona resurslaridan foydalanish – TISU talabalari va tadqiqotchilarining UPI kutubxonasidan foydalanish imkoniyatini yaratish.

Mazkur uchrashuv natijasida tomonlar o‘zaro kelishuvga erishib, hamkorlik aloqalarini mustahkamlash va istiqbolli tashabbuslarni qo‘llab-quvvatlashga tayyor ekanliklarini bildirdilar.