Termiz iqtisodiyot va servis universiteti Kasaba uyushma qo‘mitasi (KUQ) universitet nizomi va tashkiliy tuzilmasiga hamda boshlang‘ich tashkilot nizomiga asoslanib faoliyat olib boradi. KUQ universitet rahbariyati bilan hamkorlikda xodimlarning ijtimoiy, iqtisodiy va huquqiy manfaatlarini himoya qilishga yo‘naltirilgan Jamoa shartnomasi asosida ish olib boradi. Mazkur shartnomaning barcha bandlari muntazam ravishda nazoratga olinadi va amaliyotga joriy etiladi.

Kasaba uyushma qo‘mitasi tarkibi:

1. Kasaba uyushma konferensiyasi – KUQning eng yuqori organi hisoblanadi va har besh yilda bir marotaba chaqiriladi.
2. Kasaba uyushma qo‘mitasi esa konferensiyalar oralig‘ida rahbar organ hisoblanadi va besh yil muddatga saylanadi.
3. Konferensiya davomida rais, uning o‘rinbosarlari, qo‘mita va rayosat a’zolari, shuningdek, taftish komissiyasi a’zolari saylanadi.
4. Qo‘mita a’zolari konferensiya Prezidiumi, Plenumi va Rayosat qarorlarining bajarilishini ta’minlaydi.
5. KUQning moliyaviy manbai – a’zolarning oylik maoshidan ajratiladigan badallar hisoblanadi.
6. A’zolik badallari oylik ish haqi miqdorining kamida 1 foizini tashkil etadi.

Kasaba uyushma qo‘mitasining asosiy maqsad va vazifalari:

Kasaba uyushmaning bosh maqsadi – a’zolarning mehnat huquqlari, ijtimoiy-iqtisodiy holati, ma’naviy-madaniy rivojlanishi, intellektual va huquqiy manfaatlarini himoya qilishdir.

KUQ faoliyati quyidagi yo‘nalishlarda amalga oshiriladi:

• Kasaba uyushma a’zolari huquq va manfaatlarini himoyalashga oid normativ hujjatlarni ishlab chiqishda ishtirok etish;
• Mehnat qonunchiligi ustidan jamoatchilik nazoratini olib borish;
• Jamoa shartnomalarini tuzish, mehnat munosabatlaridagi kelishmovchiliklarni hal qilish;
• A’zolarning ijtimoiy himoyasini kuchaytirish;
• Madaniy-ma’rifiy tadbirlarni tashkil etish;
• KUQ a’zolari va ularning yaqinlarining sog‘lig‘ini tiklash, jismoniy tarbiya va sportga jalb qilish;
• Ijtimoiy va nodavlat tashkilotlar, xorijiy kasaba uyushmalari bilan hamkorlikni yo‘lga qo‘yish.

KUQ o‘z faoliyatini ijtimoiy sheriklik tamoyillari asosida universitet ma’muriyati bilan hamkorlikda olib boradi.

Shuningdek, qo‘mita O‘zbekiston ta’lim va fan xodimlari kasaba uyushmasi Respublika kengashi, O‘zbekiston kasaba uyushmalari Federatsiyasi kengashi, barcha oliy ta’lim muassasalari kasaba uyushmalari, respublikamizdagi teatr, san’at saroylari, sport inshootlari, sanatoriylar, dam olish maskanlari hamda bolalar sog‘lomlashtirish oromgohlari bilan doimiy hamkorlik qilib kelmoqda.